Whoops, your device has lost connection. The web page you are viewing is offline.

“Kiber Ulduz” kibertəhlükəsizlik üzrə CTF yarışı uğurla baş tutub

16.04.2023

“Kiber Ulduz” kibertəhlükəsizlik üzrə CTF yarışı uğurla baş tutub

Azərbaycan Kibertəhlükəsizlik Təşkilatları Assosiasiyasının (AKTA) təşkilatçılığı ilə 15 aprel tarixində SOCAR-ın Bakı Ali Neft Məktəbində 12-17 yaş arası yeniyetmələrin iştirakı ilə CTF yarışı keçirilib. “Ümumi təhsil müəssisələrində kibertəhlükəsizlik üzrə maarifləndirmənin  aparılması layihəsi” çərçivəsində Azərbaycan Respublikasının Elm və Təhsil Nazirliyinin və “Cyberpoint” şirkətinin dəstəyi ilə keçirilmiş yarışın texniki təşkilatçıları qismində “İnterprobe” və “UnifyBytes” şirkətləri çıxış edib. 


Məlumat üçün bildirək ki, CTF (“Capture the flag”) - kibertəhlükəsizlik sahəsində keçirilən praktiki təlim yarışlarının əsas məqsədini kompüter sistemlərinin mühafizəsi üzrə biliklərin yarış mühitində təcrübəyə tətbiq edilməsi təşkil edir. CTF yarışlarında iştirak edən şəxslər kibertəhlükəsizlik sahəsində bilik və təcrübə qazanır, yeni peşəkar əlaqələr qurur və kibertəhlükəsizlik üzrə araşdırma təcrübəsi əldə edirlər.
Tədbirin açılışında bir sıra dövlət qurumları və özəl şirkətlərin nümayəndələri iştirak edib. Açılış nitqində AKTA-nın İdarə Heyətinin sədri Elvin Balacanov bütün iştirakçıları salamlayaraq yarış barədə məlumat verib və sahə üzrə AKTA tərəfindən həyata keçiriləcək tədbirlərə dair iştirakçıları məlumatlandırıb. Həmçinin, tədbirin açılış mərasimində BANM-ın rektoru Elmar Qasımov, Dövlət Təhlükəsizliyi Xidmətinin müvafiq struktur bölməsinin rəisi Davud Rüstəmov, İnnovasiya və Rəqəmsal İnkişaf Agentliyinin sədrinin müşaviri Şahin Əliyev, Azərbaycan Respublikasının Elm və Təhsil Nazirliyinin sektor müdiri Vüsalə Əliyeva, eləcə də “Cyberpoint” şirkətinin direktoru Fuad Niftəliyev, “Unifybites” şirkətinin rəhbəri Mahir Yüksəl, "Caspian İnnovation Center" MMC-nin İnformasiya təhlükəsizliyi üzrə rəhbəri Rauf Mahmudlu və BANM-ın nümunəvi tələbələri çıxış edərək tədbirin aktuallığı barədə fikirlərini bölüşüb və yarışma iştirakçılarına öz tövsiyələrini verib.


Yarış çərçivəsində iştirakçılara veb-tətbiqetmələrdə olan zəiflik və boşluqların istismarı, kriptoqrafiya, tərs mühəndislik və s. bu kimi mövzular üzrə tapşırıqlar verilib. Gün ərzində yeniyetmələr tapşırıqları həll etməklə komanda şəklində mübarizə aparıb.


Yarışın sonunda ən yüksək nəticə göstərən 3 komanda mükafatlandırılıb və birinci yerə 2000 manat, ikinci yerə 1000 manat, üçüncü yerə 500 manat, eləcə də "Joker Sual"ını cavablandıran komandaya qiymətli hədiyyə təqdim edilib.


Qeyd edək ki, “Kiber Ulduz” CTF yarışı Azərbaycan Kibertəhlükəsizlik Təşkilatları Assosiasiyası (AKTA) tərəfindən yaradılmış Milli CTF Liqası çərçivəsində təşkil olunur. AKTA 2022-ci ildə təsis edilmiş və özündə ölkənin informasiya texnologiyaları və kibertəhlükəsizlik üzrə ixtisaslaşmış şirkət və təşkilatlarını birləşdirir. AKTA ölkəmizdə kibertəhlükəsizlik ekosisteminin gücləndirilməsi və potensialının artırılmasına dəstək verir.

© Bütün hüquqlar qorunur 2022 - 2024