Azərbaycan Kibertəhlükəsizlik Təşkilatları Assosiasiyasının Ümumi Yığıncağının iclası keçirilib
18.03.2025
18 mart 2025-ci il tarixində Azərbaycan Kibertəhlükəsizlik Təşkilatları Assosiasiyasının (AKTA) üzvlərinin iştirakı ilə Ümumi Yığıncağın iclası keçirilib. İclas iştirakçıları tərəfindən iclasın sədri və katibi müəyyənləşdirildikdən sonra iclasın gündəliyi üzrə AKTA-nın İdarə heyətinin sədri Elvin Balacanov AKTA tərəfindən hazıradək icra olunmuş tədbirlərə dair hesabat, o cümlədən icra olunan cari işlərə dair məlumatları təqdim edib. İclas iştirakçıları tərəfindən AKTA-nın əvvəlki dövr üzrə fəaliyyəti, o cümlədən cari fəaliyyəti müsbət qiymətləndirilmiş və Assosiasiyanın gələcək fəaliyyəti üzrə təkliflər səsləndirilmişdir.
Daha sonra, E.Balacanovun iş yerini dəyişməsilə bağlı müraciəti nəzərə alınaraq, Ümumi Yığıncaq iştirakçıları arasında AKTA İdarə Heyətinin yeni sədrinin seçilməsi məqsədilə müzakirələr həyata keçirilib. İclas iştirakçıları tərəfindən İdarə Heyətinin sədri vəzifəsinə “Caspel” şirkətinin kibertəhlükəsizlik məsələləri üzrə müşaviri Pənah Musayevin namizədliyi dəstəklənib. Ümumi Yığıncaq iştirakçıları arasında keçirilmiş səsvermə nəticəsində Pənah Musayevin AKTA-nın İdarə Heyətinin sədri vəzifəsinə seçilməsinə dair yekdil qərar qəbul edilib.
Ümumi Yığıncaq iştirakçıları arasında AKTA-nın gələcək fəaliyyəti üzrə məsələlərə dair fikir mübadiləsi həyata keçirilib. Kibertəhlükəsizliyin təmin olunması sahəsində qanunvericilik bazasının təkmilləşdirilməsinə, maarifləndirmə və məlumatlılıq səviyyəsinin yüksəldilməsinə, elmi-texniki və tədqiqat potensialının, o cümlədən kadr potensialının gücləndirilməsinə, habelə milli həllərin hazırlanması və tətbiq olunmasına, eləcə də əməkdaşlığın (ölkədaxili və beynəlxalq) genişləndirilməsinə dəstək verilməsi məqsədilə atılması zəruri hesab olunan addımlara dair müzakirələr aparılıb.
